Erasmus+ verkefni Víkurskóla.

Víkurskóli tekur enn á ný þátt í alþjóðlegu samstarfsverkefni skóla í gegnum menntaáætlun Evrópusambandsins. Erasmus+ í flokknum samstarfsverkefni skóla (e. School exchange parntership). Markmið áætunarinnar er að stuðla að auknu samstarfi og samskiptum meðal skóla og skólastiga í Evrópu. Þann 4. september sl. skrifaði skólastjóri Víkurskóla undir samstarfssamning við landskrifstofu Erasmus+ á Íslandi um þátttöku skólans í þessu nýja verkefni. Samstarfsskólar Víkurskóla eru staðsettir í Þýskalandi, Póllandi, Kanaríeyjum, Grikklandi og Finnlandi. Nemendum í 8.-10. bekk  gefst kostur á að heimsækja eitt þessara landa og þá mun Víkurskóli taka á móti stórum hópi nemenda frá samstarfsskólunum í maí á næsta ári. Verkefnið sem nú er lagt upp með heitir ,,Fit for life’’. Markmið þess er að gera nemendur betur meðvitaða um hvað það er sem stuðlar að hreysti sálar og líkama. Horft verður til þátta eins og hreyfingar, næringar, sjálfsmyndar, félagsfærni og andlegrar líðan. Jafnframt munu skólarnir draga fram það sem skiptir máli í þeirra menningu sem styrkir andlega vellíðan s.s. dans, tónlist, leiklist og útivist. Skólarnir munu skipta á milli sín margskonar verkefnavinnu sem tengist inn á þessa þætti.

Jón Svanur Jóhannsson verkefnastjóri skólahluta Erasmus+, Elín Einarsdóttir skólastjóri Víkurskóla og Ágúst Hjörtur Ingþórsson forstöðumaður Landskrifstofu Erasmus+ á Íslandi.

Bókagjöf

Víkurskóli á marga velunnara. Einn þeirra, Tryggvi Ástþórsson, færði bókasafni skólans fullan kassa af þessum fínu og vel með förnu bókum. Þær mun aldeilis koma að góðum notum. Víkurskóli færir Tryggva bestu þakkir fyrir góðan hug og góða gjöf.

Göngum í skólann.

Víkurskóli tekur þátt í Göngum í skólann og hófst verkefnið formlega í gær 4. september og stendur til 2. október. Markmið verkefnisins er að hvetja börn til að tileinka sér virkan ferðamáta í og úr skóla og auka færni þeirra til að ferðast á öruggan hátt í umferðinni. Í Víkurskóla eiga þess ekki allir kost að koma hjólandi eða gangandi í skólann og því munum við brydda upp á ýmsu utan dyra, göngu, hlaupi og leikjum á þessu tímabili. Við erum svo heppin að næsta nágrenni Víkurskóla er ein risa útikennslustofa. Fjölmargar gönguleiðir og fjölbreytt náttúra.  Þá verður fræðsla um hvernig best og öruggast er að haga ferðum sínum í umferðinni. Á fyrsta degi verkefnisins fór allur skólinn í hressilegan göngutúr í Víkurfjöru fyrir hádegismatinn og notaði tækifærið í leiðinni að plokka rusl á gönguleiðinni. Allir komu mjög hressir tilbaka.

 

 

Bréf frá UNICEF-Hreyfingunni

Takk kærlega fyrir samstarfið í ár! í heildina söfnuðu börn í Víkurskóla 176.453 krónum! Það er virkilega vel gert! Þetta mun nýtast UNICEF víðsvegar um heiminn í þeim tilgangi að uppfylla grundvallarmannréttindi barna.

Með þessari upphæð verður til dæmis hægt að kaupa 276.500 vatnshreinsitöflur, en með þeim er hægt að hreinsa yfir 1.3 milljón lítra af ódrykkjarhæfu vatni og gera öruggt til þess að drekka eða nota í matargerð og fl.
Kaupa yfir 7.700 skammta af bóluefni gegn mænusótt
Kaupa yfir 3.256 skammta af vítamínbættu jarðhnetumauki, nóg til þess að veita a.m.k. tólf lífshættulega vannærðum börnum þrjá mánuði af allri þeirri næringu sem þau þurfa til þess að ná heilbrigðri þyngd.
Kveðja,
Pétur Hjörvar Þorkelsson
Réttindafræðslufulltrúi / Verkefnastjóri UNICEF-Hreyfingarinnar

Skólaslit Víkurskóla 2019

Lögregluheimsókn

Fulltrúar lögreglunnar á Suðurlandi heimsóttu nemendur í 1.-10. bekk Víkurskóla í dag. Þar sem reiðhjólin eru komin í fulla notkun var vel við hæfi að rifja upp það sem þarf að hafa í huga varðandi reiðhjólin. Glitaugu, bremsur, ljós og bjalla allt atriði sem verða að virka vel. Þá var farið yfir hjálmanotkun og stillingar en hjálmanotkun er svo sannarlega til fyrirmyndar hjá nemendum skólans. Eldri nemendur fengu einni fræðslu um dráttarvélar, birhjól og torfærutæki. Við þökkum þeim Þorsteini og Emil lögreglumönnum kærlega fyrir heimsóknina og fræðsluna. (höf. Kolbrún Ósk)

Vor í Vík – Vor í Víkurskóla

Nemendur í Víkurskóla tóku þátt í verkefninu Vor í Vík. Föstudaginn 26. apríl unnu þau ásamt starfsmönnum skólans af krafti við að snyrta í kringum skólann og týna rusl á stóru svæði út frá skólalóðinni. Veðrið var hið fínasta og allir voru ánægðir með að fá tækifæri til að komast út í vorið og gera gagn í leiðinni. (höf. Elín)

.

 

Við sendum foreldrum, vinum og velunnurum Víkurskóla óskir um gleðilega páskahátíð. Við þökkum ykkur sérstaklega fyrir frábæra mætingu á árshátíð skólans. Foreldrar fá miklar þakkir fyrir glæsilegt kaffihlaðborð á árshátíðinni. Kennsla hefst að nýju þriðjudaginn 23. apríl.

Nemendur og starfsfólk Víkurskóla