Lögregluheimsókn

Fulltrúar lögreglunnar á Suðurlandi heimsóttu nemendur í 1.-10. bekk Víkurskóla í dag. Þar sem reiðhjólin eru komin í fulla notkun var vel við hæfi að rifja upp það sem þarf að hafa í huga varðandi reiðhjólin. Glitaugu, bremsur, ljós og bjalla allt atriði sem verða að virka vel. Þá var farið yfir hjálmanotkun og stillingar en hjálmanotkun er svo sannarlega til fyrirmyndar hjá nemendum skólans. Eldri nemendur fengu einni fræðslu um dráttarvélar, birhjól og torfærutæki. Við þökkum þeim Þorsteini og Emil lögreglumönnum kærlega fyrir heimsóknina og fræðsluna. (höf. Kolbrún Ósk)

Vor í Vík – Vor í Víkurskóla

Nemendur í Víkurskóla tóku þátt í verkefninu Vor í Vík. Föstudaginn 26. apríl unnu þau ásamt starfsmönnum skólans af krafti við að snyrta í kringum skólann og týna rusl á stóru svæði út frá skólalóðinni. Veðrið var hið fínasta og allir voru ánægðir með að fá tækifæri til að komast út í vorið og gera gagn í leiðinni. (höf. Elín)

.

 

Við sendum foreldrum, vinum og velunnurum Víkurskóla óskir um gleðilega páskahátíð. Við þökkum ykkur sérstaklega fyrir frábæra mætingu á árshátíð skólans. Foreldrar fá miklar þakkir fyrir glæsilegt kaffihlaðborð á árshátíðinni. Kennsla hefst að nýju þriðjudaginn 23. apríl.

Nemendur og starfsfólk Víkurskóla

Stóra upplestrarkeppnin í Víkurskóla 2019

Í gær var árleg skólakeppni 7. bekkinga í Stóru-upplestrarkeppninni. Krakkarnir stóðu sig með sóma og dómarar keppninnar stóðu frammi fyrir vandasömu verkefni að velja úr hópnum tvo sigurvegara. En að þessu sinni voru það Arnfríður Mára Þráinsdóttir og Helga Guðrún Ólafsdóttir sem voru hlutskarpastar. Við óskum þeim til hamingju og vitum að þær eiga eftir að standa sig vel í héraðskeppninni sem haldin verður 8. apríl n.k. á Hvolsvelli.

Á myndinni má sjá Þorgerði Hlín Gísladóttur umsjónarkennara 7.-8. bekkjar ásamt keppendum.

Það er fjör í forritun!

Í þessari viku fór valhópurinn í forritun í íþróttahúsið og æfði forritun án tölvu. Sett var upp þrautabraut þar sem tveir og tveir unnu  saman, annar með bundið fyrir augun og hinn leiðbeindi í gegnum þrautina með einföldum skilaboðum. Verkefnið reyndi  á samvinnu, traust og nákvæmni alveg eins og nauðsynlegt er þegar unnið er í forritun fyrir tölvuleiki og smáforrit.

Uppbrot í stærðfræðikennslunni

Einu sinni í mánuði er öðruvísi dagur í stærðfræðikennslunni hjá okkur í Víkurskóla. Þá vinna krakkarnir saman í skemmtilegum verkefnum þvert á aldur. Síðastliðinn föstudag 1. Mars var svona dagur. Það var sérstaklega gaman að sjá hvað elstu nemendurnir unnu vel með þeim yngri.

Lífshlaupið 2019

Sem Heilsueflandi grunnskóli fögnum við því að taka þátt í verkefnum eins og Lífshlaupinu www.lifshlaupid.is. Í fyrsta skipti tóku bæði nemendur ogstarfsfólk þátt í keppninni og gekk alveg ljómandi vel. Inn á heimasíðu verkefnisins er hægt að sjá úrslit í verkefninu. Þátttaka og áhugi í báðum hópum var mikill, 2. bekkur Víkurskóla var dregin út í vikulegum útdrætti á Rás 2 sem er einn af samstarfsaðilum verkefnisins. Að launum fengu 1.-2. bekkur sendan smá glaðning. Við munum alveg örugglega taka þátt að ári.

Ruslatínsla

Í dag fóru nemendur í 7.-8.b ásamt kennara út og týndu rusl í kringum skólann. Nemendur flokkuðu ruslið í tvent pappir/plast og almennt rusl.

Heimsókn frá Fjölbrautskóla Suðurlands

Í dag 7. febrúar fengu nemendur í 9.-10. bekk heimsókn frá námsráðgjöfum Fjölbrautaskóla Suðurlands. Það er mjög jákvætt hvað framhaldsskólarnir okkar á Suðurlandi bjóða upp á jákvæðar kynningar á sínu starfi. Það undirbýr okkar krakka vel fyrir það sem koma skal, kjósi þeir að nýta sér þjónustu skólanna. Það var líka sérstaklega ánægjulegt að fá einn af útskriftarnemendum 10. bekkjar frá sl. vori í heimsókn til þess að segja krökkunum frá sinni upplifun af framhaldsskólalífinu Fsu. (höf. Elín)